Qeveria e Kosovës, ka nisur procedurat ligjore për largimin nga pozitat e kryetarëve në veri, përmes iniciativës qytetare. Por ky vendim nuk po pëlqehet nga kryetari i Zubin Potokut, Izmir Zeqiri.
Ai thotë se më mirë do të ishte të japin vetë dorëheqje, me kushtin që zgjedhjet do jenë të suksesshme.
“Mirëpo të them, ky vendim nuk do të ishte i preferuar për mua. Më tepër dhe më pozitive për të gjithë do të ishte një vullnet i mirë nga spektri i gjerë, nga vetë ne kryetarët, edhe mekanizmat qeveritarë, por edhe partiakë e ndërkombëtarë, të themi është njëfarë dakordi dhe i vullnetit të mirë dhe të tërhiqemi mbi bazën e vullnetit të mirë, të japim dorëheqjen nëse kemi premisa për t’u futur në zgjedhje dhe të ishin zgjedhje të suksesshme”, tha ai në “Ditari” në Tëvë 1.
Tutje, ai tha se nuk sheh ndonjë sukses për t’u futur në garë zgjedhore, teksa deklaroi se sipas rrethanave, shihet se nuk ka edhe vullnet të shumicës për të dalë në zgjedhje.
Pas një marrëveshjeje që arriti Kosova me BE-në më 10 korrik, Zveçani, Zubin Potoku, Leposaviqi dhe Mitrovica e Veriut pritet të shkojnë përsëri në zgjedhje në vjeshtë. /Teve1.info/
