Analisti politik Aridian Zeqiri, në emisionin “Ditari” në Tëvë1, ka folur për procesin e rinumërimit të votave, duke theksuar se në këtë rast ka pasur manipulime të qëllimshme dhe jo gabime teknike.
Sipas Zeqirit, mënyra se si janë fryrë votat tregon qartë se bëhet fjalë për veprime të organizuara, ku janë të përfshira palë të ndryshme.
“Këtu shihet se çdo gjë është bërë me fryrje. Nuk mund të themi se është bërë nga ndonjë gabim. Shihet qartë se ka pasur një marrëveshje mes komisionerëve dhe partive politike”, ka deklaruar Zeqiri.
Ai ka shtuar se edhe pse ka pasur akuza për manipulim të votave edhe më herët, këtë herë ato janë marrë seriozisht dhe kanë rezultuar të bazuara.
“Ka pasur akuza se mund të ketë manipulim të votave, por kësaj radhe është fat që këto akuza janë marrë për bazë dhe është dëshmuar se ka pasur manipulim”, është shprehur ai.
Zeqiri ka veçuar Prizrenin si një nga zonat ku dyshohet se ka pasur manipulime më të theksuara, duke mos përjashtuar mundësinë që raste të ngjashme të ketë edhe në komuna të tjera.
“Duket se Prizreni ka qenë vendi kryesor i krimit me vota, por duhet të shohim nëse ka edhe në komuna të tjera. Nuk besoj se këtë e kanë bërë komisionerët në krye të vet; ka pasur marrëveshje me kandidatë të caktuar”, ka theksuar Zeqiri.
Në fund, ai ka theksuar se mbetet të shihet se si do të veprojë Prokuroria në këtë rast, duke shtuar se identifikimi i komisionerëve nuk është i vështirë.
“Është shumë lehtë të dihet se kush kanë qenë komisionerët, sepse kjo shihet edhe nga nënshkrimet. Ajo që është më e vështirë të zbulohet është marrëveshja me kandidatët”, ka përfunduar Zeqiri.
