Është bërë gati një muaj prej kur Izmir Zeqiri nga radhët e Partisë Demokratike të Kosovës ka marrë mandatin e kryetarit të Zubin Potokut.
Lidhur me këtë mandat dhe themelimin e kabinetit, Zeqiri tha se janë vonuar për shkak se kanë pritur që mos po futet brenda kabinetit ndonjë përfaqësim nga ana e serbëve.
Mirëpo ai tha se brenda kabinetit nuk është asnjë serb që përfaqëson ndonjë drejtori.
“Jemi vonuar në themelimin e gjithë kabinetit duke pritur se mos po fusim ndonjë komunikim dhe të kemi ndonjë përfaqësim edhe të serbëve, mirëpo nuk ia arritëm kështu që neve kemi kompletuar me ato kapacitete tona çfare i kemi… Jo, nuk ka asnjë serb që është drejtor në kabinet. Kemi qenë të hapur deri në javën e kaluar që shumicën e drejtorive të kemi në kuadër të serbëve, mirëpo nuk ishte e mundur për shkaqe se janë të frikësuar, nuk dëshirojnë të marrin përgjegjësi, nuk janë të gatshëm të marrin përgjegjësi në këtë legjislaturë”, tha ai në emisionin “Ditari” në Tëvë1.
Ndërkohë, Zeqiri tha në Komunën e Zubin Potokut po punohet e nuk po mendohet për zgjedhje të reja.
“Ne nuk po mendojmë për zgjedhje të reja, po punojmë, mirëpo nëse gjenden rrugët ligjore edhe interesi dhe qytetar dhe shtetëror është më me rëndësi, mirëpo duke i paraparë rrugët ligjore, ne nuk mund vetëm të tërhiqemi edhe asgjë tjetër. Çfarë do të prodhonte ajo? Do të futemi në zgjedhje nuk e dimë se çfarë do të prodhojnë?”, shtoi ai./teve1.info/
