Profesori Zeneli tha se “lufta hibride” nënkupton kombinim e luftës së armatosur me informimin.
“Është jo e zakonshme si term, në kuptimin që ka hy vonë në përdorim në diskurset publiku kudo në botë. Lufta hibride i referohet përdorimit të disa formave të luftës, pra jo vetëm frontit ushtarak por edhe frontit të informatave,ose narrativave që krijohen për çështjen,dhe po ashtu elementeve të tjera përcjellëse në një aksion ushtarak”, sqaroi Zeneli.
Ai tha se në bazë të të dhënave, lufta e Rusisë në Ukrainë ka qenë hibride për faktin se në të njëjtën ditë kur ka filluar invazioni rus në territorin e Ukrainës ka filluar edhe rritja enorme e dezinformatave dhe sipas tij, kjo është padyshim një prej elementeve të luftës hibride.
“Narrativat për luftën janë të rëndësishme në kuptimin që ju duhet ta bindni një opinion publik që të jetë pro jush. Në rastin e Rusisë kemi parë që aty ka një censurë të jashtëzakonshme, janë të censuruara rrjetet sociale me të gjitha mediumet e lira realisht dhe në këtë kuptim ajo se çfarë ka mbetur është vetëm narracioni që zhvillon Putini mbi luftën në Ukrainë, ndërkohë që qytetarët rusë janë të dezinformuar apo të keqinformuar për atë se çfarë ndodhë në Ukrainë”, potencoi Zeneli.
Ai po ashtu foli për raportin e Hibrid.info për dezinformatat për dy javët e para të luftës në Ukrainë, që ndryshe quhet Raport i Ndikimit. /teve1.info/
