Deputeti i Lidhjes Demokratike të Kosovës (LDK), Armend Zemaj, ka shprehur skepticizëm për një zgjidhje të shpejtë të ngërçit politik në vend, duke komentuar zhvillimet e fundit në Kuvendin e Kosovës.
“Nuk është vonë asnjëherë që brenda afatit kushtetues të kemi një zgjidhje të këtij ngërçi politik, por siç duket parakalimi i interesave personale ose pozitave lakmuese të VV-së po e bën të vështirë që të kemi një marrëveshje edhe në këto orë të vona të natës”, deklaroi Zemaj.
Ai theksoi se edhe pse është tentuar të thirret një seancë e re për të dalë nga kjo situatë, shpresat janë të vogla për një marrëveshje mes Nismës Socialdemokrate dhe Lëvizjes Vetëvendosje.
Zemaj ngriti shqetësime për, siç tha, “presione të ushtruara ndaj deputetëve të grupeve minoritare”, duke e konsideruar këtë si një pengesë shtesë për zgjidhjen e situatës.
“Fatkeqësisht, ju e patë se si u thirr kjo përpjekje për të dalë nga kjo mundësi, por shpresat janë të vogla”, përfundoi ai.
