Deputeti i LDK-së, Armend Zemaj ka hedhur kritika ndaj investimeve që ka bërë Qeveria Kurti në fushën e Shëndetësisë, përkatësisht renovimit që ka nisur së fundmi në një pjesë në Klinikën e Kardiokirurgjisë.
Sipas Zemaj, qeveritarët janë të paaftë, teksa ka theksuar se në spitale nuk ka “as shiringa e as infuzione”, raporton teve1.info
Ish-ministri i Shëndetësisë thotë se të njëjtit “edhe dështimin tentojnë ta prezantojnë për sukses”.
“Pas 32 muaj e dy javë të qeverisjes së VV-së në sektorin e shëndetësisë; pas menaxhimit të tre ministrave të shëndetësisë, përfshirë edhe kryeministrin, ndonëse secili më i dështuar se tjetri, tek sot e paskan proklamuar nisjen e renovimit të një pjese në Klinikën e Kardiokirurgjisë. Merreni me mend, 750 mijë euro investim pas tre viteve në Qeveri. Çfarë mashtrues janë edhe dështimin tentojnë ta prezantojnë për sukses. Të paaftë pafund e të dështuar kronikë. Ndërkohë që, sot as shiringa e as infuzione nuk ka nëpër spitalet tona. Nuk ka as letër higjenike. Nuk ka as sapun. Marre!”, ka shkruar ai në Facebook.
