Zemaj ka thënë se ky komision është formuar si rrjedhojë e një oponence ndaj komisionit hetimor të kërkuar nga opozita.
“Ky komision ka ardhur si rrjedhojë e njëfarë oponence ndaj komisionit hetimor të kërkuar nga opozita, dhe ju e dini atë periudhën, kur u bllokua votimi i komisionit paraprak”, tha Zemaj.
Zemaj theksoi se këtij komisioni i lejohet gjashtë muaj që të nxjerrë një raport dhe shpreson që ky komision nuk është formuar vetëm sa për ta penguar komisionin e kërkuar nga opozita.
“Ne duhet të fokusohemi në tri-katër elemente, janë vetëm gjashtë muaj punë që i lejohet komisionit për të nxjerrur një raport dhe besoj që nëse ka vullnet, mbi të gjitha mazhoranca është shumicë edhe në komision, atëherë do të shihet edhe gjatë procesit hetimor se për çfarë janë të interesuar, apo është ashtu siç ne kemi dyshuar se ka qenë vetëm për ta penguar komisionin hetimor për krizën energjetike, ose për disa milionë të cilat janë dhënë pa ndonjë transparencë”, deklaroi ai në Tëvë1.
Tutje Zemaj, deklaroi se LDK-ja është e interesuar që të zbardhet çdo dyshim për keqpërdorim.
“Jemi të interesuar të zbardhim çdo dyshim i cili pretendohet që ka ndodh në keqpërdorim, jo vetëm në KEK, por edhe në KOST edhe në ZRRE”, tha ai.
I pyetur se sa do të jetë e vështirë që për periudhën për 2006-2022 të hetohet vetëm për gjashtë muaj, ai ka thënë se nuk do të jetë vetëm e vështirë por si fushëveprimtari e gjatë do të jetë edhe e pamundur.
“Nuk do të jetë vetëm e vështirë, por si fushëveprimtari e gjatë do të jetë edhe e pamundshme, por ne do të ulemi dhe do të shohim se në cilat pika ne mund të përafrojmë kërkesat për intervistim të vendim marrësve”, tha Zemaj.
Deputeti i LDK-së, theksoi se partia e tij do të fokusohet në disa pika që ndërlidhen me krizën e energjisë dhe dyshimet e tyre për keqpërdorimin e parasë publike.
“Insistimi jonë, i imi dhe i LDK-së do të jetë që të fokusohemi në tri-katër pika që ndërlidhen tash edhe me këtë krizën energjetike, faktikisht edhe me dyshimet tona për keqpërdorimin e parasë publike me blerjen ose përzierja me këtë mafinë e energjisë, e cila dyshohet se ka ndodhur në ballkan”, tha ai.
