Deputeti i LDK-së, Armend Zemaj ka deklaruar se Kuvendi i Kosovës nuk e ka miratuar mandatarin e dytë për formimin e Qeverisë, duke e çuar vendin drejt zgjedhjeve të reja.
Ai ka kërkuar që procesi zgjedhor të jetë i lirë, demokratik dhe pa ndërhyrje politike.
Zemaj akuzoi Lëvizjen Vetëvendosje si përgjegjëse kryesore për bllokadën institucionale, duke thënë se ky subjekt nuk i ka numrat dhe megjithatë, sipas tij, po tenton të ndikojë në proceset kushtetuese.
“Kuvendi sot nuk miratoi mandatarin e dytë dhe Kuvendi po shkon drejt zgjedhjeve dhe ne dëshirojmë zgjedhje demokratike dhe të jashtëzakonshme, pa ndërhyrje dhe pa tendencë ashtu siq kemi parë këto ditë në vazhdimësi nga LVV si grup politik parlamentar. Ata të cilët nuk e kanë pranuar dhe nuk i kanë numrat është LVV. Ne kemi humbur shumë gjatë këtij viti, por bllokuesi dhe emri i përveqshëm i kësaj bllokade është LVV, e thrrasim presidenten që t’i respektojë afatet kushtetuese dhe të mos lejoj asnjë ndërhyrje të kudo qoftë në vendimmarrjen e saj”, deklaroi Zemaj pas dështimit të seancës për formimin e Qeverisë.
Ai i bëri thirrje presidentes që të respektojë afatet kushtetuese dhe të mos lejojë, siç u shpreh ai, ndërhyrje në vendimmarrje nga askush./teve1.info/
