Deputeti i Lidhjes Demokratike të Kosovës, Armend Zemaj i ka quajtur demagogji deklarimet e kryeministrit në detyrë, Albin Kurti se i ka votat për formimin e Qeverisë, por jo edhe për kryeparlamentarin.
Kurti në RTK ka thënë se i fton opozitën ta “testojnë” nëse i ka votat për formimin e Qeverisë.
Zemaj ka thënë se nëse Kurti i ka 61 vota, atëherë pse nuk e zgjedh kryetarin e Kuvendit.
“Kjo është tepër e pa rëndësishme për tu theksuar. Ne nuk jemi për t’u sfiduar por për të bërë zgjidhje. Këto lloj fjalësh janë të dëmshme edhe për procesin. Nëse i ka 61 vota, pse nuk e zgjedh kryetarin ose kryetaren e Kuvendit. Më shumë është demagogji për të shpërlarë veten sesa për të bërë zgjidhje”, ka thënë Zemaj para nisjes së seancës.
