Ambasadori i Kosovës për Marrëdhëniet me NATO-n, Astrit Zemaj, ka zhvilluar takim në Misionin e SHBA-së në NATO, me shefin i Misionit në detyrë, Scott M. Oudkirk.
Ai duke e vlerësuar këtë takim si shumë të rëndësishëm ka thënë se forcat amerikane në Kosovë në kuadër të NATO-s do të vazhdojnë të jenë faktor kyç si mbështetës dhe promotor i lirisë, demokracisë dhe shtetit të Kosovës.
Ai ka thënë në këtë takim është diskutuar edhe për shqetësimet për sigurinë në Ballkanin Perëndimor dhe rritjen e bashkëpunimit.
“Shtetet e Bashkuara të Amerikës janë një mik i veçantë i vendit tonë, mbështetës dhe promotor i lirisë, demokracisë dhe shtetit të Kosovës, si dhe forcimit të subjektivitetit ndërkombëtar. Forcat e SHBA-ve, të vendosura në Kosovë në kuadër të Misionit të NATO-s, KFOR-it, tani për gati tri dekada, janë garantues dhe mbështetës të fuqishëm të këtyre proceseve dhe do të vazhdojnë të jenë një faktor kyç në të ardhmen. Këto dhe tema të tjera, ku diskutuam shqetësimet për sigurinë në Ballkanin Perëndimor, mënyrat për të thelluar bashkëpunimin tonë dhe prioritetet për paqe, siguri dhe stabilitet të qëndrueshëm në Kosovë dhe rajon, ishin pjesë e diskutimeve tona”, ka shkruar Zemaj.
