Presidenti i Ukrainës, Volodymyr Zelensky, ka kërkuar nga komuniteti ndërkombëtar të rrisë ndjeshëm presionin ndaj Rusisë, pas një vale të re sulmesh ajrore që goditën Ukrainën gjatë natës, duke shkaktuar dëme të mëdha dhe viktima në disa rajone të vendit.
Në një mesazh të publikuar në rrjetin social X, Zelensky deklaroi se ekipet e shpëtimit janë duke punuar në më shumë se 30 qytete dhe fshatra të goditura, pasi Rusia lëshoi afro 300 dronë sulmues dhe gati 70 raketa, përfshirë edhe raketa balistike.
“Sulmet ishin të drejtuara qëllimisht ndaj qyteteve dhe komuniteteve të zakonshme,” shkroi presidenti ukrainas, duke renditur si objektiva të sulmeve rajonin e Kievit, Zhytomyr, Khmelnytskyi, Ternopil, Chernihiv, Sumy, Odesa, Poltava, Dnipro, Mykolaiv, Kharkiv dhe Cherkasy.
Zelensky e quajti këtë valë sulmesh “terrorizëm të pastër” dhe u bëri thirrje liderëve ndërkombëtarë që të mos heshtin përballë agresionit rus.
“Çdo sulm i tillë terrorist rus është një arsye e mjaftueshme për sanksione të reja ndaj Rusisë,” theksoi ai, duke shtuar se “Rusia po zvarrit qëllimisht këtë luftë dhe vazhdon të vrasë çdo ditë.”
Presidenti ukrainas paralajmëroi se, pavarësisht se pjesa tjetër e botës mund të jetë në fundjavë, lufta në Ukrainë nuk ndalet. Ai e kritikoi heshtjen e disa vendeve perëndimore dhe veçanërisht të Shteteve të Bashkuara, duke thënë se mungesa e një qëndrimi të fortë vetëm sa e inkurajon Kremlinin.
“Pa një presion të fortë ndaj udhëheqjes ruse, ky brutalitet nuk do të ndalet. Sanksionet janë të nevojshme. Vendosmëria ka rëndësi tani – vendosmëria e SHBA-së, e vendeve evropiane dhe e të gjithë atyre në botë që duan paqe,” tha Zelensky.
Apeli i tij vjen në një moment kritik për Ukrainën, ndërsa sulmet ruse po intensifikohen dhe ndihma ushtarake ndërkombëtare mbetet e pasigurt.
Today, rescuers have been working in more than 30 Ukrainian cities and villages following Russia’s massive strike. Wherever necessary, work continues – our emergency services are on the ground, providing assistance and supporting people. Thank you.
Nearly 300 attack drones were… pic.twitter.com/Mxx1a34kS2
— Volodymyr Zelenskyy / Володимир Зеленський (@ZelenskyyUa) May 25, 2025
