Presidenti ukrainas, Volodymyr Zelenskiy, është shprehur optimist për përparimin e ushtrisë së tij në kundërofensivë, duke e quajtur 26 qershorin si “ditë të mirë”.
“Ushtarët tanë, pozicionet tona ku kemi avancuar, janë aktive në të gjitha drejtimet në front të luftës”, ka thënë ai.
“Sot, ushtarët tanë kanë avancuar në të gjitha drejtimet, është ditë e mirë. U dëshiroj djemve më shumë ditë si kjo”.
Të hënën, Zelensky i ka vizituar ushtarët që janë duke luftuar në pjesën lindore të shtetit, dhe u ka ndarë atyre medalje.
Vendi i saktë i vizitës nuk dihet, mirëpo zyra e Zelenskyt ka thënë se i ka takuar disa njësite në rajonin Donjeck.
Zelensky ka thënë përmes një video-adresimi se është takuar me komandantë ushtarakë dhe ka maarrë “shumë vendime operacionale” bazuar në diskutime.
Ai ka thënë se një vendim ka të bëjë me forcim të marinës dhe gjithë forcave të mbrojtjes.
Shtabi i Përgjithshëm i ushtrisë ukrainase ka thënë në përditësimin e fundit më 27 qershor, se në 24 orët e fundit është raportuar për 38 përleshje në Liman, Bahmut dhe Marianka – të gjitha në pjesën perëndimore të rajonit Donjeck.
Ushtria ukrainase është raportuar të ketë kryer sulme ajrore edhe kundër pozicioneve ruse në rajonet Zaporizhja dhe Herson.
