Avokati, Yll Zekaj konsideron se Gjykata Kushtetuese e Kosovës do të vlerësojë se Kuvendi i Kosovës nuk është konstituuar siç duhet, për shkak të moszgjidhjes së nënkryetarit të pestë, i cili duhet të përfaqësojë komunitetin serb.
Sipas Zekajt, Gjykata Kushtetuese do ta cilësojë si shkelje veprimin e kryetarit të Kuvendit, Dimal Basha, si dhe mënyrën e zgjedhjes së nënkryetarëve.
“Unë besoj se Gjykata Kushtetuese në momentin kur vendos në mënyrë meritore do ta gjej si shkelje nga ana e kryetarit të Kuvendit të Kosovës, Dimal Basha edhe mënyrën e zgjedhjes së nënkryetarëve, por edhe konstatimin që kemi një Kuvend të konstituuar pa zgjedhjen e nënkryetarit të pestë përkatësisht nënkryetarit nga Lista Serbe”, ka thënë ai në emisionin “Ditari” në Tëvë1.
Tutje, Zekaj ka thënë se që nga pakoja e Ahtisarit e deri te Kushtetuta e Kosovës është e krijuar në atë mënyrë që të përfaqësohet fryma e komuniteteve në Kuvendin e Kosovës.
“Eksponentët e Lëvizjes Vetëvendosje mund të bëjnë populizëm dhe politikë, por kjo nuk qëndron absolutisht. Që nga pakoja e Ahtisarit e deri te Kushtetuta e Kosovës është e krijuar në atë mënyrë që të përfaqësohet fryma e komuniteteve në Kuvendin e Kosovës”, ka theksuar Zekaj.
Kryetari i Kuvendit, Dimal Basha e shpalli të konstituuar Kuvendin edhe pse dështoi zgjedhja e nënkryetarit nga komuniteti serb.
Basha në sqarimin e tij ka thënë se është ezauruar pika e 4 e rendit të ditës (zgjedhja e nënkryetarëve), pasi asnjë nga deputetët e Listës Serbe, por as Nenad Rashiq nuk morën votat e mjaftueshme edhe pse secili u votua nga tre herë.
