Zëdhënësi i KQZ-së, Valmir Elezi ka dal me një sqarim, pasi lista e qytetarëve me të drejtë vote që ka publikuar ky institucion ka dal të jetë më i madh se numri i përgjithshëm i popullsisë së Kosovës.
Ai ka thënë se numri i popullsisë dhe qytetarëve më të drejtë vote nuk mund të barazohen.
“Lista Votuese dhe regjistrimi i popullsisë duhet të shikohen ndaras. Në regjistrimin e popullsisë janë të përfshirë vetëm banorët rezident të pranishëm në Kosovë në kohën kur është bërë regjistrimi, pra nuk përfshihen qytetarët që jetojnë jashtë vendit, ndërkaq, në Listën Votuese përfshihen shtetasit e Kosovës me të drejtë vote që jetojnë brenda dhe jashtë vendit. Andaj, të dhënat e regjistrimit të popullsisë dhe të Listës Votuese nuk mund të barazohen”, ka shkruar ai.
Komisioni Qendror i Zgjedhjeve sot në mbledhjen e radhës ka marrë vendim për certifikimin e Listës së Votuesve brenda dhe jashtë Kosovës për procesin e Zgjedhjeve për Kuvendin e Kosovës, të cilat do të mbahen më 9 shkurt 2025.
Sipas listës së votuesve numri i qytetarëve me të drejtë vote për këto zgjedhje është 2 milionë e 75 mijë e 868 votues.
Ndërsa, sipas ASK-së nga regjistrimi që është bërë në vitin e kaluar, Kosova ka 1 milion e 602 mijë e 515 banorë.
Numri i qytetarëve me të drejtë vote që është më i madh se ai popullsisë ka ngjallë debate në vend.
