Në Kompleksin Memorial “Kodra e Kuqe” në Grabanicë të Klinës u mblodhën qytetarë dhe zyrtarë komunalë, në përkujtim të 28-vjetorit të rënies së dëshmorit të kombit, Fitim Jakupi.
Me homazhe dhe vendosje të luleve, të pranishmit nderuan figurën e Jakupit, i cili u vra 28 vjet më parë.
Pas homazheve, qytetarët dhe zyrtarët komunalë u nisën drejt fshatit Caravik.
Pikërisht në vendin ku u vra Fitim Jakupi nga forcat serbe, u zhvilluan aktivitetet përkujtimore dhe u zbulua busti i tij.
Fjalën e mori kryetari i Komunës së Klinës, Zenun Elezaj, i cili e vlerësoi familjen Jakupi për kontributin e saj ndër breza.
Më pas, fjalën e mori kryetari i Organizatës së Veteranëve të Luftës së UÇK-së, Hysni Gucati, i cili e vlerësoi lart kontributin e Fitim Jakupit.
Në fund, fjalën e mori edhe familjari i Fitimit, Gani Jakupi.
Ai falënderoi të gjithë të pranishmit për pjesëmarrjen në ceremoninë e zbulimit të bustit.
Gjatë ceremonisë nuk munguan as pikat artistike.
Aktiviteti u mbajt nën përkujdesjen e kryetarit të Komunës së Klinës, Zenun Elezaj.
Në 28-vjetorin e rënies, Fitim Jakupi u nderua me homazhe, zbulimin e bustit dhe përurimin e parkut në fshatin Caravik.
Ndërkohë, homazhe pranë varrezave të dëshmorëve u bënë edhe në Gllarevë të Klinës.
