Komisioni Qeveritar për Persona të Zhdukur ka njoftuar se janë gjetur dhe zhvarrosur mbetje mortore që u përkasin viktimave të luftës në Kosovë, të cilat ende figurojnë në listën e Personave të Zhdukur.
Këto mbetje mortore janë gjetur në vendet Lugjet e Nekës, në Bjeshkët e Strellcit.
Ndërkohë, Komisioni Qeveritar për Persona të Zhdukur u ka bërë thirrje qytetarëve që të ndajnë informacionet që ndihmojnë në këtë process.
“Në lokacionin Lugjet e Nekës, në Bjeshkët e Strellcit, janë gjetur dhe zhvarrosur mbetje mortore që potencialisht u përkasin viktimave të luftës, të cilat ende figurojnë në Listën e Personave të Zhdukur. Informatat e pranuara nga qytetarët janë adresuar në bashkëpunim me Sektorin e Policisë për Persona të Zhdukur në kuadër të Drejtorisë për Hetimin e Krimeve të Luftës dhe me Institutin e Mjekësisë Ligjore (IML), me mbështetjen e ekspertëve të EULEX-it. Me urdhër të Prokurorit kompetent, mbetjet mortore u zhvarrosën dhe u dërguan në IML për ekzaminime të mëtejme dhe identifikim përmes analizës së ADN-së. Komisioni Qeveritar për Persona të Zhdukur mbetet i përkushtuar ndaj zbardhjes së fatit të çdo personi të zhdukur dhe vazhdon bashkëpunimin e ngushtë me institucionet vendore dhe ndërkombëtare. U bëjmë thirrje qytetarëve që të ndajnë çdo informacion të mundshëm që ndihmon në këtë process”, thuhet në njoftim./teve1.info/
