Dogana e Kosovës ka njoftuar se gjatë kontrolleve të rregullta në Zyrën e Brendshme Doganore në Dheun e Bardhë janë zbuluar mallra të padeklaruara.
Sipas njoftimit zyrtar, gjatë ekzaminimit të një ngarkese, zyrtarët doganorë kanë konstatuar pjesë të përdorura për automjete, të cilat ishin futur në vend pa u deklaruar sipas procedurave ligjore doganore.
Pas verifikimit, vlera e mallit të sekuestruar është vlerësuar rreth 4 mijë euro.
Mallrat janë ndaluar, ndërsa ndaj palës përgjegjëse është inicuar procedurë për kundërvajtje doganore, në bazë të nenit 244 të Kodit Doganor dhe të Akcizës së Kosovës.
“Me fokus mbrojtjen e tregut dhe interesit publik, Dogana e Kosovës vazhdon angazhimin e saj për zbatim efektiv të ligjit dhe parandalim të shkeljeve doganore”, thuhet në njoftim./teve1.info/
