Autore: Jona Kelmendi
Në vetëm pesë ditë kontrollesh të njëpasnjëshme, inspektorët e Administratës Tatimore të Kosovës kanë identifikuar disa shkelje.
Nga data 10 deri më 14 nëntor, 60 inspektorë kanë kryer 106 kontrolle në gjithë vendin.
E gjatë këtyre kontrolleve kanë zbuluar rreth 157 punëtorë të padeklaruar në qendrat e masazhit dhe lokalet e natës.
Megjithatë, kryetari i Aleancës së Bizneseve, Agim Shahini thotë që ky numër nuk është i madh.
“Në tërë Kosovën të gjendën 157 punëtor, është një shifër simbolike, e që kjo tregon kulturën e madhe të bizneseve që të mos mbajnë punëtorë pa deklaruar dhe mendoj që kjo ka arritur efektin e vet që të promovon me rritjen e vetëdijesimit të bizneseve dhe të punëtorëve që të mos punojnë në një vend të punës e të mos jenë të deklaruar dhe të mos kenë sigurim dhe kontrata të punës”, ka thwnw Shahini.
Mirëpo sa është shuma që një biznes mund të gjobitet për një shkelje të tillë?
“Referuar dispozitave të legjislacionit në fuqi, punëdhënësit janë të obliguar që ta informojnë ATK-në, me rastin e nënshkrimit të kontratave me punëtor, madje janë të obligum që këtë ta bëjnë një ditë para nënshkrimit të kontratave dhe në rast që dështojnë ta përmbushin këtë detyrim ligjor, referuar ligjit për administrimin e faturave tatimore të njëjtit mund të jenë subjekt ndëshkimi sipas dispozitave të këtij ligji, ndëshkimi mund të shkojë në shumë fikse prej 500 euro për çdo punëtor të pa deklaruar”, ka treguar avokati Ardian Bajraktari.
Nga këto kontrolle Administrata Tatimore e Kosovës ka konstatuar edhe 20 raste të mosfiskalizimit, 35 raste të mos lëshimit të kuponëve fiskal edhe 1 rast me mall pa dokument.
