Kryetari i Këshillit të Specializantëve, Arianit Zajmi ka folur për situatën e krijuar në këtë sektor për shkak të pagesës së kujdestarive, për të cilën thonë se do të bëhet në mënyrë të jashtëligjshme.
Zajmi thotë se disa specializantë do të detyrohen të punojnë edhe pa pagesa.
“Është krijuar një situatë, ku pagesa e kujdestarive tona do të bëhet në mënyrë të jashtëligjshme në njërën anë, ndërsa në anën tjetër ne do të detyrohemi të punojmë pa pagesa, siç ka ndodhur në këta muajt, vitet e fundit për specializantët”, tha ai në emisionin “Ditari” në Tëvë1.
Ai ka thënë se nuk janë duke kërkuar asgjë përveç se të fillohet me zbatimin e vendimeve të Qeverisë.
“Ne vendimet e Qeverisë i konsiderojmë të shenjta dhe mendoj që çdo institucion duhet të punojë për me garantu sigurimin e zbatimin të vendimeve të Qeverisë sonë. Ne nuk po kërkojmë asgjë tjetër veçse me u zbatu vendimet e Qeverisë së Republikës sonë. Çdo vendim tjetër është shkelje dhe veprim antiligjor”, tha Zajmi.
Sipas kryetarit të Këshillit, ShSKUK gjen hapësira ligjore që vetëm kur ka “nevojë” i paguan specializantët.
“Për çdo kujdestari që ShSKUK-ja na ka paguar neve, tash kur të na largon neve duhet me i vendos në vendin tonë specialistët dhe për çdo kujdestari ku paguhet specialisti në vendin tonë. ShSKUK duhet me pagu ekstra 50 deri në 120 euro për kujdestari për individ që mban. Qysh është e mundur që kur po ka nevojë ShSKUK-ja po gjen hapësira ligjore dhe po na paguan, siç ka qenë rasti me COVID, të gjitha ato klinika që kanë qenë me COVID ju ka takuar çdo cent i çdo kujdestarie në përputhje me lidhin e punës. Ndërsa tash që po përfundon periudha e COVID-it po i bie ndërmend ShSKUK-së që ekzistojnë ligjet që neve na ndalojnë me kujdestaru”, deklaroi ai.
Gjatë ditës së sotme, specializantët kanë mbajtur protestë për ta kundërshtuar vendimin e ShSKUK-së, e që sipas tyre, është në kundërshtim me vendimin e Qeverisë së Kosovës për kompensimin e kujdestarisë, punën gjatë natës dhe punën jashtë orarit.
