Në një përgjigje për Teve1.info, Ymeri ka thënë se sindikalistët kanë disa kërkesa tjera jo vetëm 100 euroshin.
“Jo nuk e pranojmë, gjithçka që jep qeveria pa konsultim me neve është vendim i qeverisë ndërsa për me u plotësu kërkesat tona janë ato që i kemi thanë së paku, 100 euro deri në fillimin e zbatimit të Ligjit të Pagave ndërsa për dy kërkesat tjera, sigurimet shëndetësore dhe Ligjin mbi skemat pensionale është çështje që duhet me u marrë vesh për çfarë periudhe ata e dërgojnë në kuvend”, tha Ymeri.
Ai thotë se greva do të vazhdojë deri sa të plotësohen kërkesat e tyre.
“Në do të vazhdojmë grevën, greva vazhdon deri në plotësimin e kërkesave të SBASHK-ut. Për me ndërpre grevën duhet me u arritë një marrëveshje me u plotësu kërkesat e SBASHK-ut kështu qeveria këtë 50 euro në mënyrë të njëanshme e ka ndarë pa u konsultu me askënd”, deklaroi Ymeri.
Ndërsa, i pyetur në lidhje me deklaratën e kryeministrit Kurti që tha se “me një Kosovë me të cilën testet e PISA-s po na nxjerrin 3/4 e fëmijëve si analfabetë funksionalë ta shantazhosh qeverinë është papërgjegjësi absolute”, Ymeri theksoi se ka në Qeverinë Kurti ka anëtarë të kabinetit që kanë marrë mbi 47 milionë euro për ngritje të cilësisë e nuk i ka deklaruar.
Ai thotë se për këtë nuk është dhënë llogari asnjëherë.
“Po ia bëjë një pyetje kryeministrit Kurti dhe ministrit Murati. A e dinë që në kabinetin e vet qeveritar e kanë një anëtar të kabinetit që prej pas luftës deri më sot i ka marrë 47 milion e 424 mijë e 333 euro për ngritje të cilësisë në arsim dhe sipas juve cilësia qenka kaq e dobët, ai kurrë nuk ka dhënë llogari a ka përgjegjësi për këtë punë ai?”, ka thënë Ymeri për Teve1.info
Kryeministri i vendit, Albin Kurti sot në një konferencë për media ka bërë publike një pako ndihmese për të përballuar inflacionin. Kurti tha se nga shtatori do të ndahen nga 50 euro për zyrtarët publikë, ndërsa do të ketë pagesë të njëhershme prej 100 euro për punëtorët e ndërmarrjeve publike. /teve1.info/