Sipas analistit, Visar Ymeri, plani evropian duket të jetë dokument kornizë që vendos parimet e përgjithshme të rrugës përpara në dialog. Ymeri potencoi se kështu deklaroi edhe sot kryeministri i Kosovës, Albin Kurti, gjatë seancës në Kuvend.
Ymeri përmes një statusi në Facebook është shprehur se ky dokument parimesh nuk e vendos njohjen reciproke si njërin prej parimeve, raporton teve1.info
“Këtë po ashtu e pranoi KM sot në seancë. As nuk është kornizë parimesh që parasheh marrëveshje përfundimtare, e që thërret e parashikon mekanizma që do ta bënin marrëveshjen ligjërisht të obligueshme”, shkruan ai.
Mirëpo, sipas tij kryeministri e tha që plani evropian do të negociohet. Ai tutje ka pyetur se “ma thoni cili proces negociator ka dhënë ndonjëherë rezultat që është në kundërshtim të plotë me parimet bazë të dakorduara paraprakisht? Kur i pranon parimet bazë e ke pranuar kornizën e ngurtë sipas së cilës do të shkruhet marrëveshja. Pyetja themelore këtu: A është ky proces dialog për njohje? A jemi dakorduar me BE dhe Serbinë se të gjithë e kuptojmë që është dialog për njohje? Duket se jo”.
Tutje ai shton se është dakord që kjo është vazhdim i procesit të Brukselit.
“Proces që maksimalisht mund ta avancojë normalizimin e marrëdhënieve. Ta rris numrin e organizatave ndërkombëtare në të cilat anëtarësohet Kosova (ky si zotim e jo garancë). Ndërkohë që do ta definojë dhe zbatojë kompromisin që e bën Kosova (Bashkësinë e Komunave me Shumicë Serbe) dhe do ta lë hapur diskutimin për njohje në një të ardhme të pasaktësuar në kohë”.
