Trepça është në seri të mirë në Superligën e Kosovës në basketboll, ndërkohë që është në seri të humbjeve në FIBA Europe Cup. Së fundi pësoi në Gjermani nga Ludwigsburgu, të martën.
Dhe fazën e ngarkuar me ndeshje të mitrovicasve, shpreson ta shfrytëzojë Golden Eagle Ylli.
Ylli e Trepça takohen të shtunën nga ora 17:00 në kryendeshjen e xhiros së nëntë të Superligës së Kosovës në basketboll.
Ylli ka bilanc prej pesë fitore e tri humbje. E mban vendin e katërt në tabelë. Trepça është e dyta me 14 pikë, një më shumë se Ylli. Mitrovicasit kanë bilanc prej gjashtë fitore e dy humbje.
Njërën prej fitoreve e kanë arritur pikërisht ndaj Yllit, 77:67, në kuadër të xhiros së dytë.
Në xhiron e kaluar Ylli shënoi fitore shumë të vështirë ndaj Borës, me rezultat 73:69. Ndërkohë Trepça shkatërroi liderin e klasifikimit, Bashkimin, 82:52. “Xehetarët” kanë fituar katër ndeshjet e fundit kampionale. Në FIBA Europe Cup i kanë humbur të gjitha pesë ndeshjet.
Ylli ndërkohë është në seri prej tri fitoreve dhe suharekasit llogarisin edhe në përkrahje të shikuesve për ta vazhduar këtë ecuri.
Të shtunën është edhe ndeshja mes Vëllaznimit e Bashkimit, që fillon në ora 19:00. Prizrenasit do të mundohen të reagojnë pas humbjes në Mitrovicë, që i dha fund serisë prej shtatë fitoreve të Bashkimit. Bashkimi është lider me 15 pikë, ndërsa Vëllaznimi i ka vetëm 11 pikë në pozitën e gjashtë. Bilanci i ekipit gjakovar është tri fitore e pesë humbje.
Të dielën prej orës 19:00 është ndeshja Proton Cable Prizreni – Peja.
Ndërkohë ndeshja mes Borës dhe Sigal Prishtinës është shtyrë. Sipas FBK-së, ndeshja u shty me kërkesë të Prishtinës. Në fakt në dy sallat kryesore në kryeqytet ka aktivitete ndërkombëtare në fundjavë.
