Skuadra kosovare e Golden Eagle Yllit e ka pësuar disfatën e tretë në fazën grupore të FIBA Europe Cup.
Kampioni aktual i vendit tonë u mposht sonte në ”Pais Arena” të Izraelit nga Hapoel Nofar Galil Elioni me rezultat 85-73.
Pjesa e parë e ndeshjes ishte shumë e ngushtë (25-24, 14-16), madje ekipi i Yllit e mbylli atë me avantazh të ngushtë 39-40, e fituesi i duelit u përcaktua në pjesën e dytë.
Vendasit fituan dy periodat vendimtare në formë solide (16-9, 30-24), për të e siguruar një fitore shumë të vlefshme nga ky takim.
Tre basketbollistë realizuan pikë dyshifrore te Ylli sonte, Bashir Ahmed (20), Chris Harris (12), Henrik Shirko (10), gjersa Threatt shtoi 9 e Rashun Davis me Valon Bunjakun e mbyllën me nga 5 pikë.
Te Galil Elioni në fitore u dalluan, Nimrod Levi e Roi Huber me nga 17 pikë dhe Jalen Hudson me 12 sosh.
Momentalisht, Ylli gjendet i fundit në tabelë nga 4 ekipet e grupit me 1 fitore dhe 3 humbje, gjersa dy duelet e fundit të grupit i zhvillon si vendas, fillimisht ndaj Chemnitz Niners me 3 nëntor e me 30 të po të njejtit muaj e pret edhe Brose Bambergun.
