Golden Eagle Ylli ka vazhduar serinë e rezultateve negative në Superligën e Kosovës në basketboll, pasi ka regjistruar humbjen e pestë rresht.
Të dielën në Suharekë, Ylli u mposht nga Sigal Prishtina me rezultatin 76:69, në ndeshjen që i takoi xhiros së 17-t të elitës së basketbollit kosovar.
Përderisa Ylli regjistroi humbjen e pestë rresht, Prishtina shënoi fitoren e tretë në tri ndeshjet e fundit dhe tani ka 26 pikë, dy më shumë se ekipi nga Suhareka.
Në fakt, fituesi i këtij dueli u vendos në çerekun e fundit, pasi tre çerekët e parë, përfunduan baras: 17:17, 26:26, 17:17.
Periudhën e fundit, Sigal Prishtina e fitoi me epërsi prej shtatë pikëve (16:9) për ta konfirmuar fitoren e radhës.
Devonte Clark me 20 pikë, 4 kërcime e po aq asistime ishte më i dalluari te Prishtina, ndërsa Rashad Mahalbashiq shtoi 15 pikë, 5 kercime e 3 asistime.
Te skuadra e Yllit, Jan Palokaj pati 19 pikë, 5 kërcime e 3 asistime kurse Malcolm Armstead shtoi 11 pikë, 3 kërcime e 4 asistime.
Palokaj e Armstead ishin të vetmit te skuadra nga Suhareka me pikë dyshifrore.
