Almir Kryeziut të Ballkanit, i ka takuar epiteti i futbollistit më të mirë për xhiron e fundit në Superligën e Kosovës në futboll.
Federata e Futbollit të Kosovës (FFK), të hënën ka njoftuar se Kryeziu është shpallur më i miri i javës së nëntë në Superligë, duke e fituar çmimin “Ylli i Javës”, që ndahet pas përfundimit të çdo xhiroje.
Kryeziu është vlerësuar lart për paraqitjen e tij të fundit nga Komisioni i Veteranëve të Futbollit, i cili ka konfirmuar sulmuesin e krahut si lojtarin më të mirë të xhiros.
Në fakt, Kryeziu ia siguroi fitoren Ballkanit në ndeshjen kundër Dukagjinit, duke e mbajtur në garë për kreun e tabelës, pozitë që aktualkisht e mbanë Prishtina me vetëm katër pikë më shumë.
Ballkani triumfoi 2:0 në Suharekë ndaj Dukagjinit, ndërsa të dy golat për skuadrën e trajnerit Orges Shehi, i shënoi pikërisht Kryeziu.
Pasi mori çmimin “Ylli i Javës”, Kryeziu u shpreh tejet i lumtur dhe krenar për këtë vlerësim.
Ai falënderoi bashkëlojtarët dhe shtabin teknik të Ballkanit për besimin dhe bashkëpunimin, ndërsa shtoi se është i kënaqur në aspektin individual, por edhe me faktin që po e ndihmon ekipin e tij, me të cilin shpreson të arrijë synimet e këtij sezoni.
