Amerikani Vince Cole është përforcimi më i ri i skuadrës së Golden Eagle Ylli, që bën gara në Superligën e Kosovës në basketboll.
Ekipi nga Suhareka, të enjten e ka prezantuar amerikanin Cole, i cili ka firmosur kontratë me Yllin deri në fund të këtij edicioni. Cole, i gjatë 198 cm, së fundmi ka luajtur në kategorinë e dytë të Italisë, te skuadra Cividale.
Në 12 ndeshje të zhvilluara me fanellën e ekipit italian, Cole ka pasur një mesatare prej 12 pikëve dhe 4 kërcimeve për ndeshje.
Cole është përforcimi i dytë i Yllit brenda këtij muaji, pasi ekipi nga Suhareka javën e shkuar prezantoi amerikanin Aaron Jones.
Aktualisht, Ylli është i katërti në kampionatin e Kosovës me 33 pikë të mbledhura pas 21 ndeshjeve të zhvilluara. Ndeshjen e radhës, Ylli e luan të shtunën në udhëtim kundër skuadrës së Bashkimit.
