Mesfushori Leon Avdullahu ende nuk ka marrë një vendim të prerë se cilin shtet do ta përfaqësojë në nivelin ndërkombëtar, Zvicrën apo Kosovën.
Megjithatë, pas vizitës së krerëve të FFK-së, që i bënë Avdullahut, edhe federata zvicerane ka ndërmarrë një hap të ngjashëm në lidhje me mesfushorin e ri.
Bëhet e ditur se selektori i Zvicrës, Murat Yakin e ka përcjellë nga afër Avdullahun në miqësoren që Hoffenheimi e fitoi 8:0 ditë më parë dhe thuhet se ka pasur një takim të shkurtër me 21-vjeçarin.
Avdullahu është nga Kosova por ka lindur në Zvicër dhe ka luajtur prej gjeneratës U15 deri në gjeneratën U21 të shtetit helvetik.
Ai këtë verë u transferua nga Baseli tek Hoffenheimi dhe ka paralajmëruar se së shpejti do të marrë vendim për shtetin që do të luajë.
Muajin e ardhshëm, saktësisht më datën 5 shtator Zvicra përballet me Kosovën në kuadër të kualifikimeve për Botërorin 2026, dhe mbetet të shihet se a do të ftohet Avdullahu nga njëra prej këtyre kombëtareve dhe për cilën do të luajë.
