Xherdan Shaqiri e mbylli karrierën në përfaqësuesen e Zvicrës në mesin e korrikut të vitit 2024, pas 14 vjetësh e 125 paraqitjeve. Ai njoftoi në rrjetet sociale se ishte koha për t’i thënë lamtumirë ekipit përfaqësues.
Çuditërisht, vendimi i tij erdhi vetëm pak minuta pasi Federata e Futbollit e Zvicrës njoftoi për vazhdimin e kontratës së selektorit Murat Yakin dhe ndihmësit Giorgio Contini, në konferencë për shtyp.
Në maj të vitit 2025, Yakini tha se dera për Shaqirin është e hapur. Në fakt, në atë kohë krize, ku u përfshi edhe rënia nga Liga A e Ligës së Kombeve, Zvicra nuk e kishte kreativitetin e Shaqirit në fushë.
Shaqiri, i cili e udhëhoqi Baselin drejt titullit dhe Kupës së Zvicrës me paraqitje mbresëlënëse, edhe një herë tjetër dha shpresa për kthim. Ai e mohoi kthimin në përfaqësuese “për momentin”, duke shtuar se në futboll nuk i dihet asnjëherë.
Në emisionin sportiv “Heimspiel”, selektori i përfaqësueses helvetike, Yakin, komentoi për rastin e Shaqirit.
“Shaqiri ka bërë jashtëzakonisht shumë për futbollin në Zvicër: Ai është artist, gjeni, 10-shi i ekipit, lojtar me të majtën. Si Shaqiri ka pak në Zvicër”, ka thënë Yakin.
“Por kohët po ndryshojnë”, ka shtuar 51-vjeçari. Yakini shpjegon se Shaqiri dhe ekipi i tij kanë menduar me kujdes për situatën që është krijuar rreth tërheqjes së tij nga përfaqësuesja.
Ndoshta Shaqiri e ka menduar idenë e kthimit në përfaqësuese për përvojën që ka, thotë Yakini.
“Ai duhet ta kuptojë rolin e tij. Në fund, ai ndoshta ka menduar, ‘nuk do të kthehem si zëvendësues’”, beson Yakini.
Shaqiri u tërhoq nga përfaqësuesja me vendim të tij. “Ne nuk e kemi shtyrë atë të pensionohet”.
Në qershor, ai mendojë sërish për të dhe e kanë konsideruar së bashku rikthimin, shpjegon Yakini.
“Por nëse ai vendos tani se kjo kaptinë është e mbyllur për të, atëherë le të mbetet ashtu”, ka deklaruar Yakin.
