Presidenti i Kinës, Xi Jingping ka thënë sot në Beograd se miqësia e popullit dhe vendit të tij, me serbët dhe vendin e tyre, është e çeliktë, e sinqertë dhe e dyanshme.
Ai i bëri këto komente me rastin e pritjes që iu bë në Serbi, për çfarë tha se është i prekur, por edhe shumë i respektuar.
“Ne kemi besim që është i fortë si një shkëmb…, koordinimi është i ngushtë kur bëhet fjalë për bashkëpunimin ndërkombëtar…Unë dhe gruaja ime mbërritëm dje, tha presidenti kinez, duke vënë në dukje se e gjithë qeveria dhe presidenti… “të gjithë ishin në aeroport për të na mirëpritur… Më bëri përshtypje edhe shfaqja e vallëzimit… Sot në mëngjes pashë një grumbullim të madh njerëzish… më bëtë të mundur takimin me popullin serb… Miqësinë e popullit serb e ndjeva nga afër. Kjo miqësi është e sinqertë dhe e ndërsjellë”, theksoi Xi.
Ai më pas deklaroi se Serbia po bëhet shteti i parë evropian me të cilin Kina do të ndërtojë një komunitet – me të ardhme të përbashkët, shkruan media serbe, Danas.
Nga ana tjetër Vuçiq ka thënë se mysafirin nga Pekini Serbia e do, e respekton dhe e çmon shumë.
“Ju keni qenë me ne kur e kemi pasur më së vështiri dhe kur shumë tjerë nuk donin ta bënin këtë, ose nuk guxonin. Jemi falënderues përjetë për kujdesin që ia kushtoni vendit tonë, e po ashtu edhe për sa i përket aspektit të partneritetit strategjik që i ka hapur e mundësuar Serbisë potenciale të jashtëzakonshme për zhvillim e përparim”, ka deklaruar Vuçiq.
“Ashtu siç kemi qëndrime të qarta për integritetin kinez, se Tajvani është Kinë, ashtu edhe ata e mbështesin territorin e Serbisë pa asnjë rezervë. Ata kanë qenë me ne në momentet më të vështira, kanë qenë me ne edhe 25 vite më parë kur ky vend u shkatërrua dhe bombardohej”, ka shtuar presidenti serb.
