Xhudistët kosovarë kanë fituar dy medalje të arta në Kampionatin Ballkanik për Kadetë. Ballkaniku për grupmoshën U18 u mbajt të shtunën dhe të dielën në Krushevë të Maqedonisë së Veriut.
Në ditën e parë të garave, Uvejs Nesimi fitoi titullin e kampionit në kategorinë deri 50 kilogramë. Nesimi është anëtar i klubit të xhudos Trepça. Nga ky klub javë më parë titull ballkanik për të reja fitoi Blerina Gashi. Kjo është dëshmi se në klubin Trepça po punohet mirë.
Ndërkohë të dielën medalje të artë fitoi Blin Kuka. Ai garoi në kategorinë deri 90 kilogramë. Edhe Blini i kishte katër fitore. Mposhti tre xhudistë nga Mali i Zi dhe një nga Greqia. Në kategorinë e Blin Kukës ishin 19 garues. Blini është anëtar i klubit Ippon nga Peja, ndërsa është nipi i kryemjeshtrit Driton Kuka.
Medalje të argjendtë të shtunën fitoi Jon Veseli. Ai doli nënkampion në kategorinë deri 66 kilogramë. Kishte katër fitore para se të mposhtej në finale. Ndërsa e bronztë të shtunën ishte Sidorela Dodaj në kategorinë deri 48 kg.
Në Kampionatin Ballkanik u paraqitën rreth 400 xhudistë. Pjesë e Federatës Ballkanike të Xhudos janë Shqipëria, Bullgaria, Bosnjë-Hercegovina, Qipro, Greqia, Moldavia, Mali i Zi, Maqedonia e Veriut, Rumania, Serbia, Turqia dhe Kosova. Pra, konkurrenca në kampionate ballkanike për të rinj është shumë e madhe.
Në krye të ekipit në Kampionatin Ballkanik ishte kampionia olimpike Majlinda Kelmendi.
