Në këtë vend supozohej të ulej ministri në detyrë i Punëve të Brendshme, Xhelal Sveçla.
Por, i njëjti nuk u paraqit në Gjykatën Themelore në Prishtinë, në seancën ku do të vendosej për lartësinë e dënimit për hedhjen e gazit lotsjellës.
Edhe pa praninë e tij, seanca u mbajt.
Nga prokuroria u propozua që Sveçla të dënohet me burgim efektiv.
“Gjykatës i propozojmë që me rastin e matjes së dënimit të pandehurit, Xhelal Sveçla, t’i shqiptohet dënim me burgim efektiv në kohëzgjatje prej dy vitesh dhe dënim me gjobë në shumën prej tre mijë euro”, tha prokurori, Valdrin Krasniqi.
Fajin për akuzën për hedhje të gazit lotsjellës, Sveçla nuk e kishte pranuar asnjëherë përgjatë gjykimit.
Si rrjedhojë, pala mbrojtëse nuk pati propozim për dënim.
Në këtë situatë, Gjykata shpalli verdiktin e saj, duke e dënuar Sveçlën me burgim me kusht.
“I pandehuri, Xhelal Sveçla, pasi është shpallur fajtor sot i caktohet dënimi me burgim në kohëzgjatje prej një viti, i cili dënim nuk do të mbahet nëse i njëjti nuk kryen vepër penale brenda afatit prej një viti. Domethënë dënim i kushtëzuar. I njëjti obligohet ta paguajë paushallin në shumën prej 50 euro dhe 20 për mbrojtjen e viktimave të krimit”, deklaroi gjyqtar Sabit Sadikaj.
Paraprakisht, më 2 shtator Sveçla u shpall fajtor për veprën penale “Përdorim i armës apo mjetit të rrezikshëm”, në lidhje me hedhjen e gazit lotsjellës në Kuvend në marsin e 2018-ës.
