Lidhur me mungesën e të akuzuarit Haliti, gjykatësja e rastit Sulltane Hoti konstatoi se mbrojtësi i të njëjtit, Kujtim Krërveshi e ka njoftuar gjykatën se i akuzuari nuk mund të jetë i pranishëm në seancën e sotme, pasi është i angazhuar sipas detyrës zyrtare në një udhëtim jashtë vendit, raporton “Betimi për Drejtësi”.
Po ashtu, Kërveshi ka njoftuar se në seancën e radhës, lidhur me këtë mungesë do ofrohen dëshmitë e nevojshme.
Në seancë mungoi edhe i dëmtuari Arben Gashi, për të cilin gjykatësja Hoti bëri të ditur se i njëjti është njoftuar nga gjykata se nuk ka kushte për mbajtjen e shqyrtimit të sotëm.
Ndryshe, seancë i pranishëm ishte prokurori Besnik Jakupi. Andaj, në mungesë të kushteve për mbajtjen e kësaj seance, e njëjta u shty për kohë të pacaktuar.
Lidhur me seancën e radhës, gjykatësja Hoti konstatoi se palët do ftohen me ftesa të rregullta.
Ndryshe, sipas aktakuzës së ngritur në maj të vitit 2019 nga Prokuroria Themelore në Prishtinë, i akuzuari Xhavit Haliti më 18 maj 2018 në Kuvendin e Kosovës në Prishtinë me dashje ka sulmuar deputetin- tani të dëmtuarin Arben Gashi, duke e shtyrë me krahë dhe bërryl në gjoks.
Me këtë, Haliti po akuzohet se ka kryer veprën penale “Sulmi” nga neni 187, par.1 të Kodit Penal, vepër kjo e dënueshme me gjobë ose me burgim deri në tre vjet.