Dy zyrtarë të Ministrisë së Punëve të Brendshme janë në mesin e katër të arrestuarve nga aksionin sotëm i realizuar nga Prokuroria Themelore në Prishtinë dhe Policia e Kosovës.
Ata dyshohet se janë përfshirë në veprën penale ‘’Keqpërdorimi i pozitës apo autoritetit zyrtar’’, sipas nenit 414 të Kodit Penal të Republikës së Kosovës, të cilët dyshohen se kanë lëshuar certifikata për pajisje me leje armësh për qytetarë, pa iu nënshtruar procedurave të nevojshme ligjore.
Ndërsa dy të arrestuarit tjerë dyshohet për veprën penale ‘’Pranimi i ryshfetit në sektorin privat’’, sipas nenit 309 të KPRK-së, ka njoftuar Prokuroria e Shtetit.
“Gjatë ekzekutimit të urdhër-kontrollit janë sekuestruar disa dokumente të nevojshme, të cilat do të shërbejnë për zhvillimin e mëtejmë të hetimeve lidhur me këtë çështje penale. Prokurori i Shtetit, brenda afatit ligjor, do të parashtrojë kërkesë për caktimin e masës të sigurisë ndaj të pandehurve. Prokuroria Themelore në Prishtinë, në bashkëpunim dhe koordinim të plotë më Policinë e Kosovës, mbetet e përkushtuar në luftimin e kryerjes se veprave penale dhe në sundimin e ligjit”, thuhet në komunikatë./teve1.info/
Morën ryshfet për lëshimin e certifikatave për leje të armës, detaje nga arrestimi i të dyshuarëve
