Deputeti i Partisë Demokratike të Kosovës, Xhavit Haliti, ka ritheksuar sot qëndrimin e tij se posti i presidentit duhet t’i takojë PDK-së.
Përmes një postimi në Facebook, Haliti ka shkruar shkurt se “Presidenti duhet t’i takojë PDK-së”, duke e përsëritur kështu deklarimin që e kishte bërë më herët edhe në emisionin “Info Nata” në Tëvë1.
Në paraqitjen e tij televizive, ai kishte theksuar se presidenti i ardhshëm duhet të jetë figurë unifikuese dhe të zgjidhet përmes dialogut mes pozitës dhe opozitës. Sipas tij, nëse synohet bashkëpunim institucional dhe tejkalim i krizave politike, kandidati ideal do të duhej të vinte nga PDK-ja, ndërsa nëse jo, atëherë së paku të jetë nga radhët e opozitës.
Haliti kishte deklaruar gjithashtu se nuk është personalisht kundër rizgjedhjes së Vjosa Osmanit, por kishte nënvizuar se vendi ka nevojë për një president që siguron stabilitet politik dhe bashkëpunim ndërinstitucional, pavarësisht emrit konkret. /teve1.info/
