Xhamia e Ballies ka fituar çmimin e parë për “Arkitekturën më të Bukur Fetare në Botë” në konkursin ndërkombëtar “Building of the Year 2025” të organizuar nga ArchDaily, platforma më e madhe globale për arkitekturë dhe dizajn.
Lajmin e bëri të ditur Komuniteti Mysliman ndërsa thekson se “ky çmim i rëndësishëm konfirmon vlerat unike të kësaj xhamie, e cila ndërthur arkitekturën tradicionale islame me elementët modernë, duke krijuar një hapësirë frymëzuese për besimtarët dhe një vepër arti arkitekturore të jashtëzakonshme. Përdorimi i materialeve autentike si guri, druri dhe bakri, ndriçimi natyror dhe detajet simbolike e bëjnë këtë objekt kulti një model inovativ dhe një vlerë të çmuar për trashëgiminë fetare dhe kulturore shqiptare”.
Përzgjedhja dhe fitorja e Xhamisë së Ballies në këtë garë prestigjioze është një ngjarje e jashtëzakonshme jo vetëm për komunitetin mysliman, por për gjithë Shqipërinë. Si i vetmi objekt kulti në Evropë që ka fituar këtë çmim, xhamia tashmë është vendosur në qendër të vëmendjes ndërkombëtare, duke dëshmuar se trashëgimia dhe arkitektura shqiptare kanë një vend të rëndësishëm në skenën globale.
“Ky sukses nuk do të ishte i mundur pa kontributin dhe mbështetjen e palëve të ndryshme. Një falënderim i veçantë shkon për arkitektin Jurtin Hajro dhe Commonsense Studio për vizionin dhe punën e tyre të përkushtuar në realizimin e kësaj vepre madhështore.
Po ashtu, mirënjohje për Ambasadën e Kuvajtit dhe të gjithë ata të cilët mbështetën me bujari ndërtimin e kësaj xhamie dhe që luajtën një rol të rëndësishëm në realizimin dhe finalizimin e këtij projekti monumental.
Ky vlerësim ndërkombëtar është një dëshmi e rëndësisë së trashëgimisë islame në Shqipëri dhe e punës së palodhur për të ruajtur dhe promovuar vlerat shpirtërore dhe arkitekturore të vendit tonë.
Urime të përzemërta për këtë arritje të jashtëzakonshme dhe suksese të mëtejshme në shërbim të besimit dhe kulturës sonë kombëtare!”, theksohet në reagimin e Komunitetit Mysliman.
Ky vlerësim është përshëndetur nga presidenti, Bajram Begaj. “Urime për Xhaminë e Ballies – Fituesja e Çmimit Ndërkombëtar për Arkitekturën më të Bukur në botë, në konkursin ndërkombëtar “Building of the Year 2025”!”, shkruan presidenti./rtsh.al/
