Pas vendosjes së flamurit të Kosovës në Komunën e Leposaviqit, njohësi i çështjeve politike, Visar Xani thotë se tani mision është se sa do të mund të mbahet aty.
Në edicionin special në Tëvë 1, Xani theksoi se Kosova duhet të tregohet serioze dhe e fuqishme për ta mbajtur situatën në kontroll.
“Ne u kënaqëm që e pamë flamurin e Kosovës aty, por tash misioni tjetër është se sa do të mund ta mbajmë flamurin e Kosovës. Dhe suksesi i gjithë këtij projekti, konsideroj është që Kosova të tregohet serioze dhe të tregohet e fuqishme për të mbajtur situatën me të cilën ka filluar ballafaqimi dhe duket që ka tash për tash në kontroll me forcat policore”, deklaroi ai.
Sipas tij, deklarata e ambasadorit amerikan Jeff Hovenier ishte shumë e ashpër.
“Por çka ka ikur këtu nga dora?! Ka ikur nga dora duket që procesi koordinues diplomatik. Deklarata e ambasadorit amerikan ishte shumë e qetë, ishte shumë e ashpër, dhe konsideroj do duhej të ishte jashtëzakonisht një situatë e pakoordinueshme dhe papajtueshme për të parë një deklaratë të tillë nga SHBA”, shtoi Xani.
Ambasadori Hovenier ka thënë se masat e sotme të dhunshme duhet të ndërpriten menjëherë. Ai po ashtu ka deklaruar se SHBA-ja dënon “veprimet e vazhdueshme të autoriteteve kosovare për të hyrë në ndërtesat komunale në veri të Kosovës”.
Situata në veri është tensionuar që nga mesdita e sotme, si shenjë pakënaqësie nga serbët lokal pas betimit që kanë bërë dje kryetarët e komunave në Leposaviq, Zubin Potok, dhe Zveçan. /Teve1.info/
