Analisti, Visar Xani,e vlerëson shumë të rëndësishëm faktin që askush deri më tani nuk ka dalë kundër hapjes së Urës së Ibrit.
Sipas Xanit, ky problem i trashëguar duhet të zgjidhet përfundimisht, por pa pasoja politike e strategjike si dhe në bashkëpunim të gjithë përfaqësuesit diplomatik në Kosovë.
“Është shumë më rëndësi që të kemi qartësi, të kemi pozicionime dhe strategji të përbashkët për të hapur Urën e Ibrit për shkak që askush deri më tash nuk ka dalë kundër hapjes së Urës së Ibrit pra kjo është shumë e rëndësishme. Dhe nuk flitet për ndonjë kufi ose pikë të caktuar, është një problem i trashëguar mbase edhe me kompromise politike që nga viti 99, por që don një zgjidhje përfundimtare dhe ajo zgjidhje duhet të jetë pa pasoja politike, pa pasoja strategjike dhe pa tensione. Në këtë frymë konsideroj që rruga e vetme është që të ketë bashkëpunim të plotë më KFOR-in, NATO-n dhe me përfaqësues të tjerë diplomatik në Kosovë ”, ka thënë ai në emisionin “Ditari” në tëvë1.
Tutje, ai ka thënë se edhe kryeministri, edhe presidentja, duhet të kërkojnë hapjen e Urës, mirëpo nuk duhet të caktojnë ndonjë datë pa qenë në kordinim më të gjithë për datën.
“Prandaj edhe kryeministri, edhe presidentja, patjetër që duhet të kërkojnë hapjen e Urës së Ibrit por të mos caktojnë datë pa pasur një kordinim të plotë për atë datë me qëllim që të ketë sukses.Çdo datë tjetër pa kordinim mund të na ballafaqojë me situata të paparashikueshme”, ka shtuar Xani.
Xani ka folur edhe për paralajmërimet e BE-së për masa shtesë ndaj Kosovës.
Ai ka thënë se nuk beson që do të ketë masa, pasi ato do të vendosen vetëm nëse njëanshëm hapet ura, e sipas tij një gjë e tillë nuk do të ndodhë.
“Kosova e ka të qartë se nuk mund të hapet ura e Ibrit pa koordinim, por nëse arrin me i bind ndërkombëtarët se duhet të hapet ura, atëherë është një punë e mirë që ka ba Qeveria dhe shumë në rregull që ka tentu apo po tenton për të hapur urën e Ibrit”, ka thënë Xani.
