Kuvendi Komunal i Vitisë, me nismën e kryetarit të komunës Sokol Haliti, e ka shpallur sot “Qytetar Nderi” ish-ambasadorin e OSBE-së dhe diplomatin amerikan, William Walker.
Ky titull ju dha atij në një seancë të jashtëzakonshme të Kuvendit Komunal të Vitisë, ku u bë edhe zbulimi i bustit të tij dhe ju dha edhe çelësi i qytetit.
Me këtë rast kryetari Haliti, ka folur edhe për kontributin dhe personalitetin e Walkerit.
“Ambasadori William Walker është një figurë e shquar që ka lënë një ndikim thelbësor në zhvillimet dhe transformimet në Kosovë gjatë periudhës së tij të shërbimit. Me një karrierë të pasur diplomatike dhe një përkushtim të veçantë ndaj çështjeve të Ballkanit dhe të drejtave të njeriut, Ambasadori Walker ka qenë një udhëheqës i shquar dhe një ndihmës i palodhur në rrugën drejt paqes dhe stabilitetit në këtë rajon të ndërlikuar”, u shpreh kryetari Haliti.
Ai tha se një nga kontributet më të rëndësishme të ambasadorit Walker, ishte monitorimi i ngjarjeve dhe situatës në terren duke theksuar se ai luajti një rol kyç në raportimin e objektivave për shkeljet e të drejtave të njeriut dhe ngjarjet e ndryshme që ndodhën gjatë kohës së luftës.
Kurse ambasadori Wiliam Walker, fillimisht tha se ai ndihet i nderuar për respektin që ju bëhet në Kosovë, duke potencuar se ai viziton Kosovën çdo vit, në veçanti Reçakun dhe kompleksin e familjes Jashari.
Ai shtoi se Kosova ka arritur një progres të madh të zhvillimit në një kohë të shkurtër. Ai tha se vjen në Kosovë pasi që është i dashuruar në këtë vend, duke falënderuar të gjithë ata që e respektojnë atë.
Në këtë seancë të gjithë këshilltarët e pranishëm ishin pro propozim vendimit për shpalljen e Walker qytetar nderi i Vitisë./teve1.info/
