Në Dhomat e Specializuar të Kosovës (DhSK) në Hagë, ka filluar dëshminë ish-komandanti i NATO-s, Wesley Clark në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Clark është dëshmitari i shtatë dhe i fundit i mbrojtjes së ish-presidentit Hashim Thaçi.
Ai mban kodin 1DW-007 në këtë proces gjyqësor dhe është së bashku me përfaqësuesen e Ambasadës së SHBA-së në gjykatë pasi që është dëshmitarë për të cilin kanë dhënë autorizim Shtetet e Bashkuara të Amerikës.
Dëshmia e ish-komandantit suprem të forcave të NATO-s në Evropë, Wesley Clark, pritet të zgjasë deri të mërkurën më 19 nëntor 2025, e që pas saj do të mbahet edhe një konferencë për ecurinë e çështjes.
Clark e udhëhoqi fushatën ajrore të NATO-s kundër caqeve ushtarake serbe më 1999.
Mbrojtja ka filluar me paraqitjen e provave të saj më 15 shtator 2025, ku për tri ditë me radhë u dëgjua ish-ndihmësi i sekretarit amerikan të shtetit, James Rubin.
Ndërsa, pas tij u thirr ish-këshilltari ligjor i delegacionit shqiptar në Rambuje, Paul Williams. Kurse, ish-këshilltari politik i komandantit të lartë të NATO-s, Wesley Clark, John Stewart Duncan filloi dëshminë më 22 shtator dhe e mbaroi më 23 shtator 2025.
Kurse, më 30 shtator nisi dëshminë James Peter Covey, ish-zëvendës i përfaqësuesit të OKB-së në Kosovë, Bernard Kouchner. Covey e përfundoi dëshminë më 2 tetor.
Më pas, ish-diplomati amerikan Christopher Hill filloi dëshminë më 10 nëntor 2025 dhe vazhdoi edhe më 11 nëntor 2025 dhe 12 nëntor 2025. E ish-këshilltari politik i Wesley Clark, Michael Durkee dëshmoi më 12 dhe 13 nëntor 2025.
Dëshminë e Clark mund ta ndiqni këtu.
