Numërimi i votave në gjithë vendvotimet në Kosovë ka përfunduar.
Tani kanë mbetur edhe votat nga diaspora, ku sipas të dhënave të Komisionit Qendror të Zgjedhjeve, pas numërimit të votave në qendrat komunale të numërimit, si dhe 39 nga 40 përfaqësitë diplomatike dhe një nga shtatë vendvotimet e votave me postë, Lëvizja Vetëvendosje ka mbërritur në fiks 50 për qind të votave në rezultatet e përmbledhura.
Nga numërimi i deritashëm, VV-ja ka marrë 447 mijë e 179 vota.
Partia e dytë është Partia Demokratike e Kosovës me 20.76 për qind të votave, Lidhja Demokratike e Kosovës me 13.44 për qind dhe Aleanca për Ardhmërinë e Kosovës me 5.57 për qind.
Politologu Avdi Smajlaj përqindjen e Vetëvendosjes e sheh një numër të madh të votave për një parti politike.
“Si numër i votave është i madh për një parti politike, është jo i zakonshëm sepse për të marrë një qeveri 90 për qind të votave do donin që Kosova në këto 4 vite të ishte bërë anëtar i OKB-së, BE-së, NATO-së, në PISA të dilnim të parët, e kështu më radhë, gjëra të cilat nuk kanë ndodhur. Kjo është një votë jo shumë e zakonshme”, tha ai.
E në anën tjetër, politologu Dorajet Imeri thotë që diaspora është një bastion për lëvizjen Vetëvendosje.
“Krejt çka duhet që të marrim mësim nga kjo është që me diasporën nuk mund të shihet vetëm si kontigjent votash, duhet të shihet edhe si potencial jo vetëm për zgjedhjet dhe demokracinë por edhe për zhvillimin ekonomik dhe mirëqenies. Nëse partitë politike nuk e marrin si mesazh këtë se çfarë ka ndodhur në këto zgjedhje dhe nuk punojnë shumë me qytetarët e atjeshëm si qeveri e si opozitë unë mendoj që ky rezultat do të jetë i njëjtë edhe në zgjedhjet e ardhshme që do mbahen”, deklaroi ai.
Sipas rezultateve të publikuara, në zgjedhjet e 28 dhjetorit, Lëvizja Vetëvendosje ka thyer rekordin e votave të marra në vitin 2021. Partia e Albin Kurtit, asokohe kishte marrë 438 mijë e 335 vota.
Kronikë e realizuar nga gazetarja Jona Kelmendi.
