Në reagimin e VV-së dërguar medieve kjo parti thekson se për mënyrën e votimit është njoftuar nga raportimet në medie.
VV-ja ka thënë se ata nuk kanë synim për ndërhyrje në pavarësinë e këtij institucioni.
Partia e në pushtet vlerëson se zgjedhja e anëtarëve të ri të Këshillit Drejtues nuk përkon me pritjet për Universitetin e Prishtinës.
“Duam të njoftojmë opinionin publik se Lëvizja VETËVENDOSJE! as nuk ka si synim dhe as nuk bën përpjekje për të dirigjuar organizmat universitarë. E kundërta, ne “dirigjohemi” në plot fusha e çështje tonat nga mendimi universtar dhe profesorët e Universitetit të Prishtinës. Sigurisht nga çfarë pamë, niveli i përfaqësuesve në organin drejtues të Universitetit nuk përkon as me nivel e shumicës aty as me pritjet që i kanë të gjithë për Universitetin. Ne as nuk qëndrojmë prapa e as mbështesim asnjë votim në Universitet, por po ashtu as nuk bëhemi pjesë e shkeljes së autonomisë e Universitetit”, thuhet në reagimin e VV-së, shkruan teve1.info.
Kjo parti ka theksuar se UP për gjatë 20 viteve të kaluara ka qenë në shërbim të pushtetit.
“Fatkeqësisht gjatë njëzet viteve të shkuara Universiteti u bë i pushtetit. Filluan të banojnë aty edhe forma të ndryshme të korruptimit që kishin lidhje me partitë në pushtet”, thuhet në reagim.
Reagimi i plotë i VV-së:
Pas zgjedhjeve studentore në Universitetin e Prishtinës u mbajt edhe mbledhja e Senatit ku u votuan 5 anëtarët e Këshillit Drejtues që vijnë nga vota e Senatorëve.
Shumëkush brenda dhe jashtë Universitetit kuptoi për rrjedhën e këtij procesi edhe nga raportimet, qëndrimet e kundërshtimet publike. Edhe ne në Lëvizjen VETËVENDOSJE! kuptuam për procesin nga këto raportime. Dhe ndajmë shqetësimin e thellë me plot universitarë, studentë dhe qytetarë për gjendjen të cilën pasqyron ky proces.
Nuk gjenden shumë reagime të Lëvizjes VETËVENDOSJE! për punët e brendshme të Universitetit të Prishtinës ndër vite. Kjo ngase ne ndajmë besim se rezistenca ndaj zvetënimit të universitetit duhet të ngjajë nga brenda mjediseve universitare midis profesorëve e studentëve. Aq më shumë që ky Universitet është shënjuesi i fortë i rezistencës intelektuale në historinë e universiteteve. Edhe për ngjarjet e fundit ndajmë shqetësimin por edhe shpresën se brenda universitetit ka aq vrull dhe kapacitet e energji për organizim ndaj çdo forme që cënon idenë e universitetit dhe jetën e brendshme të tij.
Duam të njoftojmë opinionin publik se Lëvizja VETËVENDOSJE! as nuk ka si synim dhe as nuk bën përpjekje për të dirigjuar organizmat universitarë. E kundërta, ne “dirigjohemi” në plot fusha e çështje tonat nga mendimi universtar dhe profesorët e Universitetit të Prishtinës.
Sigurisht nga çfarë pamë, niveli i përfaqësuesve në organin drejtues të Universitetit nuk përkon as me nivel e shumicës aty as me pritjet që i kanë të gjithë për Universitetin.
Ne as nuk qëndrojmë prapa e as mbështesim asnjë votim në Universitet, por po ashtu as nuk bëhemi pjesë e shkeljes së autonomisë e Universitetit.
Universiteti ka qenë dhe do të jetë gjithmonë vend i rezistencës ndaj së padrejtës. Vend i dijes. Vend ku krahas profesionalizmit te studenti ushqehet edhe ndjenja e dashurisë dhe lirisë për vendin.
Institucionet qendrore kanë dërguar 4 anëtarë, prej të cilëve 50% gra, me kredibilitet të lartë profesional dhe personal, që angazhohen çdo ditë për përmirësimin e gjendjes në Universitet. Kurse, ka shumë të ngjarë që anëtarët e tjerë, të votuar në senat, janë pjesë e asaj që është zhvilluar për më shumë se 20 vite në këtë Universitet.
Nëse Lëvizja VETËVENDOSJE!, apo qeverisja e saj mund “të kritikohet” në këtë pjesë, është vetëm për mosndërhyrje në autonominë e Universitetit.
Siç e bëri të ditur edhe ministrja e MASHTI-t, Arbërie Nagavci, do të çlirohet secili institucion arsimor në vend, dhe universitetin do ta bëjmë vend të dijës dhe shkencës ku vlojnë diskutimet dhe idetë e nuk mësohet krimi e korrupsioni.
