Lëvizja Vetëvendosje ka zyrtarizuar Jeton Rakën si kandidat për kryetar të Komunës së Kaçanikut në zgjedhjet lokale që do të mbahen më 12 tetor. Nominimi i tij është bërë në një takim të mbajtur në qytetin e Kaçanikut, ku morën pjesë drejtues të lartë të partisë, përfshirë Kryeministrin Albin Kurti, sekretarin organizativ Alim Rama dhe koordinatorin e qendrave të VV-së, deputetin Zyba.
Jeton Raka, i cili aktualisht ushtron funksionin e zëvendësministrit në Ministrinë e Mjedisit, Planifikimit Hapësinor dhe Infrastrukturës, është vlerësuar për përkushtimin dhe angazhimin e tij në shërbim të qytetarëve. Sipas VV-së, përvoja dhe profesionalizmi i tij do të reflektohen edhe në nivel lokal, përmes një qeverisjeje të ndershme, transparente dhe të orientuar drejt zhvillimit.
“Me Jeton Rakën dhe VETËVENDOSJE!-n, Kaçaniku do të bëhet shembull i një qeverisjeje të mirë dhe të përgjegjshme,” thuhet në njoftimin e Lëvizjes.
Në fjalën e tij, Kryeministri Kurti shprehu besimin se fitorja e VV-së në nivelin lokal do të përforcojë punën e bërë deri më tani nga qeveria qendrore dhe do t’i japë një shtysë të re zhvillimit të Kaçanikut.
VV ftoi të gjithë qytetarët e Kaçanikut, nga qyteti dhe fshatrat përreth, që të bashkohen me këtë iniciativë për ndryshimin e shumëpritur në qeverisjen lokale.
