Zëdhënësi i Lëvizjes Vetëvendosje, Arlind Manxhuka, i është kundërpërgjigjur kryeministrit të Shqipërisë, Edi Rama, pas deklaratave të këtij të fundit rreth qëndrimeve të Vetëvendosjes për Gjykatën Speciale dhe raportet mes dy vendeve.
Manxhuka i ka kërkuar Ramës të tregojë cilat hapa konkretë ka ndërmarrë në organizatat ndërkombëtare për të “sfiduar padrejtësinë që po bëhet në Hagë” ndaj ish-krerëve të Ushtrisë Çlirimtare të Kosovës (UÇK).
“Edi Rama duhet të tregojë për hapat konkretë që ka bërë për ta sfiduar padrejtësinë që po bëhet në Hagë, nëpër organizatat ndërkombëtare ku Shqipëria është anëtare,” ka deklaruar Manxhuka.
Reagimi i tij erdhi pasi gjatë ditës, kryeministri Rama kishte thënë se Vetëvendosja “po i ngatërron marrëdhëniet institucionale të Kosovës me Shqipërinë në çorbën e balotazheve komunale”, duke theksuar se Gjykata Speciale ishte ngritur “për trafikimin me organe, dhe jo për të marrë peng presidentin e Kosovës”.
Në përgjigje, Manxhuka ka thënë se Rama “mund të përpiqet të krijojë përshtypje personale me eskivazhe të padenja”, por se është e domosdoshme të përgjigjet qartë dhe konkretisht për çështjet që ka ngritur Vetëvendosja.
“Edi Rama duhet të sqarojë nëse ka ardhur në Kosovë për të bindur deputetët e Kuvendit për themelimin e Gjykatës Speciale, dhe nëse e ka mbështetur apo shtyrë këtë proces,” ka shtuar Manxhuka.
Ai ka kërkuar gjithashtu që Rama të tregojë në cilat organizata ndërkombëtare ka ngritur shqetësime për “padrejtësinë që po i bëhet Kosovës në Hagë”, duke përmendur OKB-në, Këshillin e Evropës, OSBE-n dhe NATO-n.
“Të tjerat janë vetëm për konsum personal dhe as për konsum të brendshëm politik,” ka shkruar Manxhuka, duke theksuar se debatet duhet të fokusohen në fakte, e jo në përshtypje.
Ndërkohë, nesër nga ora 17:00, në Tiranë do të zhvillohet protesta mbarëkombëtare “Drejtësi për Çlirimtarët”, në mbështetje të ish-krerëve të UÇK-së që po gjykohen në Hagë.
