Presidenti i Serbisë, Aleksandar Vuçiq, gjatë fjalimit të tij në Asamblenë e Përgjithshme të Kombeve të Bashkuara, ka falënderuar shtetet që nuk e kanë njohur pavarësinë e Kosovës.
Vuçiq tha se 107 shtete nuk e kanë njohur pavarësinë e Kosovës dhe pretendoi se disa prej tyre kanë qenë nën presion për të ndryshuar qëndrimin e tyre.
“Dua të falënderoj individualisht secilin nga 107 shtetet që nuk e kanë njohur pavarësinë e shpallur njëanshëm nga e ashtuquajtura Kosovë. E dimë se shumë prej jush keni qenë subjekt i presionit. Faleminderit që keni qenë konsistente”, tha Vuçiq.
Në fjalimin e tij, presidenti serb kritikoi edhe ndërhyrjen e NATO-s në Serbi në vitin 1999, duke e lidhur atë me çështjen e Kosovës.
“Tentuan të merrnin 14 për qind të territorit të Serbisë. Kjo mund të duket si e kaluar e largët për ta, por plagët e vendosura në të drejtën ndërkombëtare janë të thella dhe të rënda”, deklaroi ai.
Vuçiq foli edhe për Marrëveshjen e Brukselit të vitit 2013.
Ai pretendoi se Serbia i ka përmbushur obligimet e saj të përcaktuara në marrëveshje, ndërsa tha se nuk është zbatuar krijimi i Asociacionit të Komunave me Shumicë Serbe në Kosovë.
“Dua t’ju paralajmëroj të gjithë këtu, kujdes kur nënshkruani me fuqitë e mëdha. Kështu nënshkruam Marrëveshjen e famshme të Brukselit në vitin 2013, duke tentuar të zgjidhim problemet mes serbëve dhe shqiptarëve përmes kompromisit”, tha Vuçiq.
Ai shtoi se, sipas tij, të gjitha obligimet e ndërmarra nga Serbia janë përmbushur, ndërsa Asociacioni i Komunave me Shumicë Serbe ende nuk është themeluar.
Çështja e Kosovës zuri një pjesë të rëndësishme të fjalimit të presidentit serb në OKB.
Vuçiq përsëriti qëndrimin e Beogradit se Kosova është pjesë e territorit të Serbisë dhe se Serbia do të vazhdojë të mbrojë, siç tha ai, integritetin territorial dhe parimet e Kartës së Kombeve të Bashkuara.
Në fjalimin e tij, ai iu referua edhe Rezolutës 1244 të Këshillit të Sigurimit të OKB-së, duke e lidhur atë me qëndrimin e Serbisë për statusin e Kosovës.
