Presidenti serb Aleksandar Vuçiq tha sot se mandati i tij po mbaron së shpejti dhe se mund të japë dorëheqjen, duke deklaruar se nuk dëshiron ta shkurtojë mandatin e tij siç bëri dikur Presidenti Boris Tadiç: “me një formulim të pakuptimtë, sepse ose jep dorëheqjen ose je president deri në fund të mandatit tënd”.
“Pra, është e mundur që unë të jap dorëheqjen së shpejti”, u tha Vuçiç gazetarëve në Pekin në fillim të vizitës së tij në Kinë.
Ai tha gjithashtu se disa tubime, duke iu referuar atij të mbrëmshëm në Slavija, nuk mund të jenë shqetësuese, veçanërisht kur ato janë pa përmbajtje të menduar mirë, boshe ose veçanërisht të shumta, duke akuzuar organizatorët e tubimit për incidente pas përfundimit të tij, shkruan N1, përcjell KosovaPress.
Ai deklaroi se tre shërbesa dhanë vlerësime për turmën e mbrëmshme, duke filluar nga 30,500 deri në 34,300, dhe “ne pranuam vlerësimin më të lartë”, megjithëse, tha ai, të dhënat e sakta tregojnë se të pranishëm ishin pak më pak se 34,000 persona.
Siç deklaroi ai, Partia Progresive Serbe do të organizojë tubime nga 26 deri më 28 qershor, por “më të rëndësishme se numrat tanë janë mesazhet që do t’u dërgohen qytetarëve”.
Mbrëmë dhjetëra mijëra njerëz, të udhëhequr nga studentët universitarë, ishin mbledhur në kryeqytetin serb për të protestuar kundër qeverisë dhe për të kërkuar zgjedhje të parakohshme.
Kjo protestë konsiderohet një ndër protestat më të mëdha në Serbi në vitet e fundit.
