Presidentët e Serbisë dhe Turqisë, Aleksandër Vuçiq dhe Rexhep Tajip Erdogan, në një bisedë telefonike në prag të vazhdimit të dialogut Beograd-Prishtinë, kanë vlerësuar se gjëja më e rëndësishme është ruajtja e paqes në Ballkanin Perëndimor.
Sipas komunikatës së presidencës së Serbisë, bashkëbiseduesit thanë se duke punuar në forcimin e marrëdhënieve serbo-turke, do të japin një kontribut të fuqishëm për stabilitetin rajonal.
Vuçiq shprehu edhe një herë “keqardhjen e tij të sinqertë për numrin e madh të viktimave të tërmeteve shkatërruese dhe përsëriti gatishmërinë e Serbisë për të ndihmuar në eliminimin e pasojave të fatkeqësisë natyrore që goditi Turqinë”, shkruan N1, përcjell teve1.info.
Sipas deklaratës, Erdogan falënderoi Vuçiqin për sakrificën e ekipeve të shpëtimit nga Serbia, të cilat morën pjesë në ofrimin e ndihmës për banorët e qyteteve të prekur nga tërmeti në Turqi.
