Presidenti i Serbisë, Aleksandar Vuçiq, ka thënë se kryeministri i Kosovës, Albin Kurti ka vetëm një dëshirë – të shkaktojë konflikte në Kosovë dhe një konflikt të madh ndërmjet serbëve dhe NATO-s.
Sipas tij, Kurti po dëshiron të çojë në gjakderdhje të gjithë rajonin dhe theksoi se ai është i vetmi fajtor për atë që po ndodh në Kosovë.
“Në tre ditët e fundit edhe një person i pafuqishëm dhe politikisht analfabet ka mundur të kuptojë se çfarë po përgatitej për sot dhe gjithçka në organizatën e Kurtit, me dëshirën për të pasur një konflikt të madh mes serbëve dhe NATO-s”, ka thënë Vuçiq.
Vuçiq, pas adresimit të tij, ka thënë se do të niset menjëherë drejt pikës kufitare me Kosovën
“Ne do t’i vizitojmë ata sonte dhe nuk do të lejojmë therjen e serbëve. Kam biseduar me zyrtarë ndërkombëtarë dhe nesër duhet të mbahet një takim me përfaqësuesit e Quintit”, tha ai, shkruan Tanjug.
Ai ka shtuar se kërkon nga serbët në Kosovë që të mos hyjnë në konflikt me NATO-n
“Unë po kërkoj nga serbët e Kosovës dhe Metohisë që të mos hyjnë në konflikt me NATO-n, jo se kemi frikë, por se e dëshiron më së shumti Kurti, le të protestojnë në mënyrë paqësore, sikur bënë sot, le të ulen, sepse kur ata kundërshtojnë pushtuesin shqiptar në mënyrë paqësore, atëherë askush nuk mund t’i nënshtrojë”, apeloi ai.
Ndërsa theksoi se Shefi i Shtabit të Përgjithshëm ka kërkuar takim me komandantin e KFOR-it, Ristuccia.
