Presidenti i Serbisë, Aleksandar Vuçiq, tha se Beogradi do të bëjë gjithçka për të shtensionuar situatën në Kosovë.
Vuçiq po merr pjesë në një samit evropian në Kishinjev të Moldavisë, ku në një postim në llogarinë e tij në Instagram, ai tha se në margjina të kësaj ngjarjeje, ka pasur një sërë takimesh, përfshirë atë me presidenten e Komisionit Evropian, Ursula von der Leyen, dhe me kryeministrin e Holandës, Mark Rutte.
“Biseda për sfidat aktuale në ‘Kosovë e Metohi’, në rajonin e Ballkanit Perëndimor, për rrugën evropiane të Serbisë, por edhe për marrëdhëniet dypalëshe dhe forcimin e dialogut politik dhe intensifikimin e bashkëpunimit ekonomik. Ndajmë të njëjtin përkushtim për të ardhmen e përbashkët, paqen dhe stabilitetin”, shkroi Vuçiq në Instagram.
Udhëheqësit e 27 vendeve të Bashkimit Evropian dhe të 20 vendeve të tjera evropiane janë mbledhur sot në Kishinjev të Moldavisë, për të diskutuar për një varg çështjesh, mes tyre edhe tensionet në veri të Kosovës.
Përpara fillimit të samitit, përfaqësuesi i lartë i Bashkimit Evropian, Josep Borrell, tha se ata që shkaktojnë dhunë në veri të Kosovës duhet të mbajnë përgjegjësi për ato akte.
“Më duhet të insistoj se dhuna nuk është zgjidhje. Dhuna duhet dënuar. Dhe autorët e kësaj dhune duhet të mbajnë përgjegjësi”, tha Borrell.
Ai paralajmëroi takim për situatën në veri me presidentin e Serbisë, Aleksandar Vuçiq, pasi për të njëjtën temë kishte biseduar me kryeministrin e Kosovës, Albin Kurti në Bratislavë, të mërkurën e 31 majit.
Kreu i diplomacisë evropiane paralajmëroi se duhen shmangur përshkallëzimi dhe lëvizjet e pakoordinuara.
