Serbia nuk konsiderohet më një demokraci, sipas vlerësimeve më të fundit nga organizatat ndërkombëtare që matin cilësinë e qeverisjes dhe të lirive politike.
Pas raporteve të publikuara nga Freedom House dhe V-Dem Institute, edhe Bertelsmann Stiftung Transformation Index (BTI) ka konstatuar përkeqësimin e vazhdueshëm të standardeve demokratike në vend.
Sipas raportit të vitit 2026, Serbia është ulur nga kategoria “demokraci me mangësi” në “autokraci e moderuar”, pas një periudhe të gjatë të rënies demokratike.
Ky vlerësim reflekton shqetësime të thella mbi funksionimin e institucioneve, sundimin e ligjit dhe liritë politike në vend.
Aktivistë dhe zëra kritikë brenda Serbisë theksojnë se janë duke bërë përpjekje për t’i rezistuar asaj që e quajnë konsolidim të autoritarizmit dhe për të rikthyer standardet demokratike. Megjithatë, ata bëjnë thirrje që komuniteti ndërkombëtar të tregojë më shumë vëmendje dhe angazhim ndaj zhvillimeve në vend.
Sipas tyre, përkeqësimi i situatës demokratike në Serbi nuk prek vetëm qytetarët e saj, por paraqet rrezik edhe për stabilitetin e Ballkanit dhe më gjerë në Evropë.
