Një person mbeti i vrarë në mesditën e së shtunës, në afërsi të njërit prej hoteleve të lagjes “Arbëria” në kryeqytet.
Përpos viktimës, në këtë incident të lënduar mbetën edhe dy persona të tjerë.
Policia e Kosovës ka bërë të ditur se një person ka vdekur në vendin e ngjarjes pas plagëve të marra.
“Bazuar në të dhënat fillestare nga arma e zjarrit lëndime ka pësuar një person, i cili në vendngjarje ka ndërruar jetë, vdekjen e tij e ka konstatuar ekipi mjekësor. Ndërsa dy persona të tjerë të lënduar(dyshohet me mjet të mprehtë) janë dërguar për tretman mjekësor. Aktualisht hetuesit policor, në koordinim me prokurorin e shtetit janë duke punuar për të ndriçuar dhe sqaruar të gjitha rrethanat që kanë të bëjnë me këtë ngjarje”, ka thënë zëdhënia Flora Ahmeti.
Dy të lënduarit u dërguan në emergjencë në QKUK, ku pas trajtimit të marrë janë drejtuar për në klinika tjera.
“Të dytë janë duke u trajtuar në QKUK, saktësisht në Klinikën e Kirurgjisë Torakale. Gjendja e njërit është në rrezik për jetë, kurse tjetri është në gjendje stabile”, tha Naser Syla, drejtor i emergjencës në QKUK.
Motivet e këtij incidenti nuk dihen ende.
Pas përfundimit të hetimeve nga Policia e Prokuroria, në vendin e ngjarjes doli edhe kompania e pastrimit, për të larguar gjurmët e gjakut.
Kronika e realizuar nga gazetarja Florijeta Dernjani
